Komo ayudar kon Kantoniko? Traduizir palavras ke mankan

Una manera en ke vos puedesh ayudar es kon las traduksiones de palavras de ladino a inglez.

En esta pajina puedesh ver una lista de palavras ke se uzan en los egzempios (frazas) ke tenemos en Kantoniko ke no tienen una traduksion a dinguna lingua.

Efektivamente estas palavras no egzisten en el diksionario de Kantoniko.

Al lado de kada palavra puedesh ver numeros. Kada numero es un atadijo a un egzempio en ke se uza esta palavra. Eyos pueden ayudar entender el konteksto de kada palavra.

Komo puedesh ayudar?

Kon las konjugasiones de verbos, por egzempio la palavra "abolti", mandame la traduksion de la palavra i tambien mandame una fraza ke eksplike: "La palavra 'abolti' es el pasado del verbo 'aboltar'."

Kon otras palavras, por egzempio "bolos": Pudesh eskrivir ke "La palavra 'bolos' es el plural de la palavra 'bolo'. I tambien mandame la traduksion de las palavras.

Ande mandar las traduksiones?

Penso ke seria mijor si mandash estas eksplikasiones al adreso de Ladinokomunita. Esto dara a los moderadores la oportunidad de korijar yerros, i tambien toda la djente aki puedran ver vuestas kontribusiones. En el titulo eskrivi:

Kantoniko: la palavra bolos

o

Kantoniko: la palavra abolti

Esto ayudaria muncho a Miriam Sherman i a mi (Gabor Szabo), apersivir ke es un mesaj para Kantoniko.